කළුතර මහාධිකරණය විසින් පුද්ගල ඝාතනයකට චෝදනා එල්ලවූ තිදෙනෙකුට මරණ දඬුවම නියම කර තිබේ.
අදාළ නඩු විභාගයේ තීන්දුව ලබාදෙමින් කළුතර මහාධිකරණ විනිසුරු ප්‍රදීප් අබේරත්න මහතා එම සිදුවීම සම්බන්ධයෙන් තවත් පුද්ගලයෙකුට වසර 10 ක බරපතළ වැඩසහිත සිරදඬුවම් නියම කළේය.
මීගමවත්ත ජනපදය ප්‍රදේශයේ පදිංචිව පුද්ගලයෙකු 1992 වර්ෂයේදී නවුන්තුදුව ප්‍රදේශයේදී පොලු මුගුරුවලින් පහරදී ඝාතනය කිරීම සම්බන්ධයෙන් ඔවුන්ට එරෙහිව චෝදනා එල්ලවී තිබුණි.
ඒ අනුව අදාළ නඩුවේ 3, 4 සහ 5වන විත්තිකරුවන්ට මෙලෙස අධිකරණය විසින් මරණ දඬුවම නියම කර ඇත.
එම ඝාතන සිද්ධියේ පළමු විත්තිකරුට බරපතළ වැඩසහිත සිරදඬුවම් නියම කර ඇති අතර 2 වන සැකකරු මේ වනවිට මියගොස් ඇති බව අනාවරණය වී තිබේ.
