රජයට අයත් රාජ්‍ය ව්‍යවසායන් ප්‍රතිසංවිධානය කිරීමේ වැඩපිළිවෙළ යටතේ තෝරාගත් ආයතන 33ක් ඈවර කිරීමේ ක්‍රියාවලිය මේ වන විට ක්‍රියාත්මක වන බව මුදල් අමාත්‍යාංශය අනාවරණය කර තිබේ.මෙම කටයුතු විධිමත්ව සිදුකිරීම සඳහා විශේෂ ඒකකයක් පසුගිය මාර්තු මාසයේදී මුදල් අමාත්‍යාංශය යටතේ පිහිටුවා ඇති අතර, එම ඒකකය මඟින් අදාළ ආයතන සම්බන්ධ ඉදිරි කටයුතු මෙහෙයවනු ලබයි.මේ අතර, රාජ්‍ය ව්‍යවසායන් කිහිපයක සේවක අර්ථසාධක අරමුදල් (EPF), සේවක භාරකාර අරමුදල් (ETF) සහ සේවයෙන් ඉවත්වීමේදී ගෙවිය යුතු පාරිතෝෂික මුදල් සම්බන්ධයෙන් පවතින පැරණි හිඟ ගෙවීම් පියවීමට ද රජය පියවර ගෙන තිබේ.ඒ සඳහා වෙන්කර ඇති රුපියල් බිලියන 5ක මුදලින් රුපියල් බිලියන 2.8ක් 2026 අගෝස්තු මාසය අවසන් වන විට ගෙවා අවසන් කර ඇති බව සඳහන් වේ.තවද මැදපෙරදිග කලාපයේ පවතින ගැටුම්කාරී තත්ත්වය හේතුවෙන් මේ වසරේ දෙවන කාර්තුවේදී රාජ්‍ය ව්‍යවසායන් රැසකට ආර්ථික හා මෙහෙයුම් ගැටලුවලට මුහුණ දීමට සිදුව ඇති බව ද අමාත්‍යාංශය පෙන්වා දෙයි.අමුද්‍රව්‍ය මිල ඉහළ යාම, භාණ්ඩ සැපයුම් ක්‍රියාවලියට බාධා ඇතිවීම සහ ලැබී තිබූ ඇණවුම් අවලංගු වීම එම අභියෝග අතරට අයත් වේ.කෙසේ වෙතත්, ප්‍රධාන රාජ්‍ය ව්‍යවසායන් 51ක් 2026 වසරේ මුල් මාස හය තුළ රුපියල් බිලියන 259.3ක ඒකාබද්ධ ලාභයක් උපයා ඇති බව අමාත්‍යාංශය වාර්තා කරයි.2025 වසරේ එම කාලසීමාවේදී වාර්තා වූ රුපියල් බිලියන 227.8ක ලාභය සමඟ සසඳන විට මෙවර ලාභය රුපියල් බිලියන 31.5කින් ඉහළ ගොස් තිබේ.ඒ අනුව රාජ්‍ය ව්‍යවසායන් ඈවර කිරීමේ වැඩපිළිවෙළට සමගාමීව, ඉතිරි රාජ්‍ය ආයතනවල මූල්‍ය කාර්යසාධනය සහ සේවක හිඟ ගෙවීම් සම්බන්ධයෙන් ද අවධානය යොමු වී ඇත.
රාජ්‍ය ආයතන 33ක් ඈවර කිරීමේ ක්‍රියාවලිය ඉදිරියට – මුදල් අමාත්‍යාංශයෙන් අනාවරණයක්
RELATED ARTICLES