ඉන්ධන මිල ඉහළ යාම හේතුවෙන් ත්‍රීරෝද රථ සේවා ගාස්තු සංශෝධනය කිරීමේ අවශ්‍යතාවක් මතුව ඇති බව ත්‍රීරෝද රථ රියදුරන්ගේ සංගමයක් පෙන්වා දෙයි.ජාතික ඒකාබද්ධ ත්‍රීරෝද රථ රියදුරන්ගේ හා කර්මාන්තකරුවන්ගේ සංගමයේ ප්‍රධාන ලේකම් එල්. රෝහණ පෙරේරා මහතා සඳහන් කර ඇත්තේ දැනට පවතින ගාස්තු ඉහළ නැංවීම සඳහා යෝජනාවක් ඉදිරිපත් කිරීමට සූදානම් බවයි.ඒ අනුව දැනට පළමු කිලෝමීටරය සඳහා අය කරන රුපියල් 110ක මුදල රුපියල් 120 දක්වාත්, දෙවන කිලෝමීටරයේ සිට අය කරන රුපියල් 90ක ගාස්තුව රුපියල් 100 දක්වාත් ඉහළ දැමිය යුතු බව එම සංගමයේ යෝජනාව වී තිබේ.ඉන්ධන මිල ඉහළ යාමට අමතරව ත්‍රීරෝද රථ ධාවනය සඳහා අවශ්‍ය අනෙකුත් වියදම් ද වැඩි වී ඇති බැවින් රියදුරන් දැඩි ආර්ථික අපහසුතාවකට මුහුණ දී සිටින බව සංගමය පෙන්වා දෙයි.මේ සම්බන්ධයෙන් ජාතික ගමනාගමන කොමිෂන් සභාව වෙත යෝජනාව ඉදිරිපත් කිරීමට නියමිත අතර, ඉදිරි දින කිහිපය තුළ එම ආයතනයෙන් ලැබෙන ප්‍රතිචාරය අනුව ඉදිරි ක්‍රියාමාර්ග තීරණය කරන බව ද සඳහන් වේ.යෝජිත ගාස්තු සංශෝධනය ක්‍රියාත්මක වුවහොත් ත්‍රීරෝද රථ භාවිත කරන මගී ජනතාවට ද ඒ පිළිබඳ බලපෑමක් ඇති විය හැකිය.
ඉන්ධන මිල ඉහළ යාමත් සමඟ ත්‍රීරෝද රථ ගාස්තුත් ඉහළ දැමීමේ සූදානමක්
RELATED ARTICLES