හෝමූස් සමුද්ර සන්ධිය හරහා නව නාවික ගමන් මාර්ග තීරණය කිරීම සඳහා ඕමානය සමඟ අවසන් ගිවිසුමකට එළැඹීමට සූදානම් බව ඉරානය පවසයි.
කෙසේ වෙතත්, හෝමූස් සමුද්ර සන්ධිය නැවත විවෘත කිරීමට නම් වන්දි ගෙවීම, සම්බාධක ඉවත් කිරීම සහ රාජ්ය තාන්ත්රික තර්ජන නැවැත්වීම ඇතුළු කොන්දේසි කිහිපයක් අමෙරිකාව විසින් සපුරාලිය යුතු බව ඉරානය අවධාරණය කර තිබේ.
පසුගිය පෙබරවාරි අගදී අමෙරිකාව සහ ඊශ්රායලය එල්ල කළ ප්රහාරවලට ප්රතිචාර ලෙස ඉරානය මෙම මුහුදු මාර්ගය වසා දැමූ බව සඳහන් වේ.
ඉරාන විදේශ අමාත්ය අබාස් අරක්චි පවසා ඇත්තේ ඕමානය සමඟ ඇති කරගන්නා ගිවිසුම මගින් නව නාවික මාර්ග තීරණය කළද, අමෙරිකාව ඉරානයේ ඉල්ලීම් ඉටු කරන තෙක් සමුද්ර සන්ධිය විවෘත නොකරන බවයි.
අමෙරිකාව ජූනි මාසයේ ඇති කරගත් අතුරු ගිවිසුම කඩකර ඇති බැවින් සෘජු සාකච්ඡා නොපවත්වන බවත්, මැදිහත්කරුවන් හරහා පමණක් පණිවිඩ හුවමාරු වන බවත් ඔහු සඳහන් කර ඇත.
ඉරානය ඉදිරිපත් කර ඇති ප්රධාන කොන්දේසි වන්නේ:
• අමෙරිකානු ප්රහාරවලින් සිදුවූ හානියට වන්දි ගෙවීම.
• ඉරානයට එරෙහි තර්ජන සහ ඉරාන හිතවාදී පාර්ශ්වයන්ට එල්ල කරන ප්රහාර නැවැත්වීම.
• පර්සියානු ගල්ෆ් කලාපයේ අමෙරිකානු නාවික වැටලීම් නැවැත්වීම.
• ඉරානයට එරෙහි සම්බාධක ඉවත් කිරීම සහ අත්හිටුවා ඇති ඉරාන දේපළ නිදහස් කිරීම.
මේ අතර අමෙරිකානු ජනාධිපති ඩොනල්ඩ් ට්රම්ප් සඳහන් කර ඇත්තේ තමන් ඉරානය සම්බන්ධයෙන් දැඩි ලෙස මැදිහත් නොවී එරට ආර්ථික පීඩනය දෙස බලා සිටින බවයි.
