පාපන්දු ලෝක කුසලානයේ බ්‍රසීලයට විශිෂ්ට ජයක් – හයිටි තරගාවලියෙන් ඉවතට

පාපන්දු ලෝක කුසලාන තරගාවලියේ මෙරට වේලාවෙන් අද (20) උදෑසන අවසන් වූ තරග ද්විත්වයකදී බ්‍රසීලය සහ පැරගුවේ කණ්ඩායම් ජයග්‍රහණ වාර්තා කිරීමට සමත් විය.
‘C’ කාණ්ඩයේ තීරණාත්මක තරගයකදී ලෝක ශ්‍රේණිගත කිරීම්වල 6වැනි ස්ථානයේ පසුවන බ්‍රසීලය ගෝල 3-0ක පහසු ජයක් වාර්තා කළේය. තරගයේ පළමු අර්ධයේදීම බ්‍රසීලය ගෝල තුනම වාර්තා කරමින් තරගයේ පාලනය තමන් අතට ගත්තේය.
මෙම පරාජයත් සමඟ ලෝක ශ්‍රේණිගත කිරීම්වල 91වැනි ස්ථානයේ පසුවන හයිටි කණ්ඩායමට තරගාවලියෙන් ඉවත්වීමට සිදුවනු ඇතැයි වාර්තා වේ. බ්‍රසීලය මෙම ජයත් සමඟ අවසන් 32 දෙනාගේ වටයට සුදුසුකම් ලබා ඇත.
එමෙන්ම ‘D’ කාණ්ඩයේ තවත් තරගයකදී පැරගුවේ කණ්ඩායම ලෝක පාපන්දු පිටියේ ප්‍රබල කණ්ඩායමක් වන තුර්කිය ගෝල 1-0කින් පරාජය කිරීමට සමත් විය.
තරගයේ ආරම්භක මිනිත්තු කිහිපය තුළම වාර්තා වූ එකම ගෝලය මගින් පැරගුවේ කණ්ඩායම පෙරමුණ ලබා ගත් අතර, පසුව දැඩි ආරක්ෂක ක්‍රීඩා රටාවක් අනුගමනය කරමින් තුර්කියට සමාන කිරීමේ අවස්ථා අහිමි කළේය.