සමාජ මාධ්ය තුළ පුළුල් ලෙස සංසරණය වූ කුරුණෑගල ප්රදේශයේ මෝටර් රථයක් ගිනිගන්නා අවස්ථාවේ කුඩා දරුවෙකු ඒ අසලින් ගමන් කරන වීඩියෝව සම්බන්ධයෙන් පොලිස් මාධ්ය කොට්ඨාසය පැහැදිලි කිරීමක් නිකුත් කර තිබේ.
පොලීසිය සඳහන් කළේ, වීඩියෝව සමඟ සංසරණය වන හඬපට මඟින් අදාළ දරුවා මෝටර් රථයට ගිනි තැබූ බවට පවසන නමුත්, ඒ බව සනාථ කරන කිසිදු ඇසින් දුටු සාක්ෂියක් හෝ විද්යාත්මක සාක්ෂියක් මේ දක්වා අනාවරණය වී නොමැති බවයි.
මෙම සිද්ධිය 2026 ජූලි 3 වැනිදා කුරුණෑගල පොලිස් වසමේ පිහිටි පාසල් භූමියකදී සිදුව ඇති අතර, රුපියල් ලක්ෂ 140ක් පමණ වටිනා මෝටර් රථයක් ගින්නෙන් විනාශ වී තිබේ.
පසුව, වයස අවුරුදු 8ක පමණ දරුවෙකු මෙම ගිනි තැබීමට වගකිව යුතු බවට පැමිණිල්ලක් ලැබීමෙන් අනතුරුව කුරුණෑගල පොලීසිය පුළුල් විමර්ශනයක් ආරම්භ කර ඇත.
විමර්ශනවලදී වීඩියෝවේ දැක්වෙන්නේ එම පාසලේම අධ්යාපනය ලබන 8 හැවිරිදි සිසුවෙකු බව හඳුනාගෙන ඇති නමුත්, ඔහු මෝටර් රථයට ගිනි තැබූ බව තහවුරු කරන කිසිදු සාක්ෂියක් මෙතෙක් ලැබී නොමැති බව පොලීසිය අවධාරණය කළේය.
සිද්ධිය සම්බන්ධයෙන් අධිකරණයට කරුණු වාර්තා කර ඇති අතර, මෝටර් රථය ගිනි ගැනීමට සැබෑ හේතුව අනාවරණය කර ගැනීම සඳහා රජයේ රස පරීක්ෂක දෙපාර්තමේන්තුවේ විශේෂඥ වාර්තා සහ පරීක්ෂණ ප්රතිඵල ද අපේක්ෂා කෙරේ.
නිල විමර්ශන අවසන් වීමට පෙර සමාජ මාධ්ය ඔස්සේ පැතිරෙන තහවුරු නොකළ තොරතුරු හෝ සාවද්ය ප්රචාරයන් විශ්වාස නොකරන ලෙස පොලිස් මාධ්ය කොට්ඨාසය මහජනතාවගෙන් ඉල්ලීමක් කර ඇත.
