ජීවිත බිලිගත් මාරක අනතුරු
දිවයිනේ ප්‍රදේශ කිහිපයක සිදුවූ රිය අනතුරු තුනකින් කාන්තාවක් ඇතුළු පුද්ගලයින් තිදෙනෙකු මියගොස් තිබේ.
ඊයේ (27) එම අනතුරු පොල්පිතිගම, බද්දේගම සහ පෑලියගොඩ යන පොලිස් වසම්වලින් වාර්තා වූ බව පොලීසිය පැවසීය.
ගල්ටැංවැව – හිරිපිටිය මාර්ගයේ දංගොල්ලාගම ප්‍රදේශයේදී යතුරුපැදියක් පැදිකාරිය විසින් ඇඳගෙන සිටි සාරියේ කොටසක් පිටුපස රෝදයට හිරවීම හේතුවෙන් යතුරුපැදිය මාර්ගයේ පෙරළීමෙන් අනතුරක් සිදුව ඇත.
අනතුරින් බරපතළ තුවාල ලැබූ යතුරුපැදිකාරිය හිරිපිටිය රෝහලට ඇතුළත් කර වැඩිදුර ප්‍රථිකාර සඳහා කුරුණෑගල රෝහලට මාරුකර යවා ප්‍රථිකාර ලබමින් සිටියදී මියගොස් ඇත.
එලෙස මියගොස් ඇත්තේ, නිකදළුපොත ප්‍රදේශයේ පදිංචිව සිටි 53 හැවිරිදි කාන්තාවකි.
මේ අතර බද්දේගම – වදුරබ මාර්ගයේ සුදුවැලිපත ප්‍රදේශයේදී යතුරුපැදි දෙකක් එකිනෙක ගැටී සිදුවූ අනතුරකින් පුද්ගලයෙකු මියගොස් තිබේ.
එලෙස මියගොස් ඇත්තේ, සුදුවැලිපොත ප්‍රදේශයේ පදිංචිව සිටි 50 හැවිරිදි පුද්ගලයෙකි.
කොළඹ – නුවර ප්‍රධාන මාර්ගයේ ජ්‍යෙරාජ් ප්‍රනාන්දුපුල්ලේ අනුස්මරණ ගුවන් පාලම ආසන්නයේදී කොළඹ දෙස සිට නුවර දෙසට ගමන් ගන්නා මංතිරුවේ සිට අනෙක් මංතීරුවට පදික මාරුව නොවන ස්ථානයකින් මාර්ගය හරහා ගමන්කළ පුද්ගලයෙකු හඳුනා නොගත් රථයක ගැටී අනතුරක් සිදුව ඇත.
අනතුරින් බරපතළ තුවාල ලැබූ පදික පුද්ගලයා කොළඹ ජාතික රෝහලට ඇතුළත් කිරීමේදී මියගොස් තිබේ.
එලෙස මියගොස් ඇත්තේ, පෑලියගොඩ ප්‍රදේශයේ පදිංචිව සිටි 55 හැවිරිදි පුද්ගලයෙකි.
