පූජ්‍ය ගලගොඩඅත්තේ ඥානසාර හිමියන්ට ජනාධිපති සමාව ලබාදී දැනට පවතින අර්බුදකාරී තත්ත්වය විසඳීමට කටයුතු කළ යුතු බව එක්සත් ජාතික පක්ෂය අවධාරණය කර තිබේ.මේ සම්බන්ධයෙන් පක්ෂය නිකුත් කළ නිවේදනයක දැක්වෙන්නේ ත්‍රෛනිකායික මහා නාහිමිවරුන්ගේ දැනුම්දීම අනුව ඥානසාර හිමියන්ගේ නිදහස වෙනුවෙන් පැවැත්වූ සත්‍යග්‍රහය තාවකාලිකව අවසන් කිරීමට පියවර ගෙන ඇති බවයි.හිටපු අග්‍රවිනිශ්චයකාර සරත් එන්. සිල්වා මහතාගේ අදහස අනුව, අධිකරණයට අපහාස කිරීමේ වරදට නියම කළ හැකි උපරිම සිරදඬුවම් කාලය මාස 18ක් බව ද එම නිවේදනයේ සඳහන් කර තිබේ. ඥානසාර හිමියන් මේ වන විට මාස 10කට වැඩි කාලයක් බන්ධනාගාරගතව සිට ඇති බව ද පක්ෂය පෙන්වා දෙයි.මහා නාහිමිවරුන්ගේ ඉල්ලීම මත මීට පෙර ද ඥානසාර හිමියන්ට ජනාධිපති සමාව ලබාදීමට කටයුතු කර තිබූ බව එම නිවේදනයේ සිහිපත් කර ඇත. එමෙන්ම ශ්‍රේෂ්ඨාධිකරණ තීන්දුව සම්බන්ධයෙන් ද පක්ෂය කරුණු ඉදිරිපත් කරමින් නැවත සමාව ලබාදීම සලකා බැලිය හැකි බව ප්‍රකාශ කර තිබේ.ඥානසාර හිමියන්ගේ නිදහස වෙනුවෙන් පැවති පාගමනට සහ සත්‍යග්‍රහයට සහභාගී නොවූ භික්ෂූන් වහන්සේලා සම්බන්ධයෙන් ද අධිකරණ නියෝග ලබාගැනීමට කටයුතු කිරීම පිළිබඳව පක්ෂය සිය විරෝධය පළ කර ඇත.තවද, ඥානසාර හිමියන්ගේ සිවුර ඉවත් කිරීමට නියෝග කළ බව කියන සිද්ධිය සම්බන්ධයෙන් ද විමර්ශනයක් පැවැත්වීම සුදුසු බව එම නිවේදනයේ සඳහන් වේ.ත්‍රෛනිකායික මහා නාහිමිවරුන්ගේ මැදිහත්වීමෙන් ඥානසාර හිමියන්ට ජනාධිපති සමාව ලබාදී අදාළ අර්බුදය විසඳීමට වහාම පියවර ගත යුතු බව එක්සත් ජාතික පක්ෂය වැඩිදුරටත් අවධාරණය කර තිබේ.
ඥානසාර හිමියන්ට ජනපති සමාව ලබාදෙන්නැයි UNPයෙන් ඉල්ලීමක්
RELATED ARTICLES