ශ්රී ලංකා මහ බැංකුව නිකුත් කළ නවතම වාර්තාවට අනුව, 2026 වසරේ මුල් මාස හය තුළ මෙරට සංචාරක කර්මාන්තයෙන් ලැබූ ආදායම පසුගිය වසරේ එම කාලසීමාවට සාපේක්ෂව අඩුවී තිබේ.
වාර්තාවේ දැක්වෙන්නේ මෙම වසරේ ජනවාරි සිට ජුනි දක්වා සංචාරක ආදායම අමෙරිකානු ඩොලර් මිලියන 1,511.1ක් ලෙස වාර්තා වී ඇති අතර, 2025 වසරේ එම කාලසීමාවේදී එය ඩොලර් මිලියන 1,712.6ක් වූ බවයි.
මාසික සංඛ්යාලේඛන අනුවද සුළු පසුබෑමක් දක්නට ලැබේ. මැයි මාසයේදී සංචාරක ක්ෂේත්රයෙන් ඩොලර් මිලියන 155.7ක ආදායමක් උපයා තිබූ අතර, ජුනි මාසයේදී එය ඩොලර් මිලියන 151.1 දක්වා පහළ ගොස් ඇත. එමෙන්ම 2025 ජුනි මාසයේ වාර්තා වූ ඩොලර් මිලියන 169.5 සමඟ සැසඳීමේදීද මෙවර ජුනි මාසයේ සංචාරක ආදායම අඩු මට්ටමක පවතින බව සඳහන් වේ.
මේ අතර, විදෙස්ගත ශ්රී ලාංකිකයන්ගෙන් ලැබෙන ප්රේෂණ සම්බන්ධයෙන්ද වාර්තාව තොරතුරු ඉදිරිපත් කරයි. මැයි මාසයේදී ඩොලර් මිලියන 847ක් ලෙස සටහන් වූ ප්රේෂණ ප්රමාණය ජුනි මාසයේදී ඩොලර් මිලියන 695 දක්වා පහත වැටී ඇති අතර, මාස දෙක අතර වෙනස ඩොලර් මිලියන 152ක් වේ.
කෙසේ වෙතත්, වාර්ෂික පදනම මත සලකා බැලීමේදී විදෙස් ප්රේෂණවල වර්ධනයක් පෙන්නුම් කරයි. 2025 වසරේ මුල් මාස හයේදී ඩොලර් මිලියන 3,738ක් ලෙස වාර්තා වූ ප්රේෂණ ආදායම, 2026 වසරේ එම කාලසීමාවේදී ඩොලර් මිලියන 4,604.8 දක්වා ඉහළ ගොස් තිබේ.
ඒ අනුව, පසුගිය වසරේ මුල් මාස හයට සාපේක්ෂව මෙවර වසරේ විදෙස් ප්රේෂණ ආදායම අමෙරිකානු ඩොලර් මිලියන 866.8කින් වර්ධනය වී ඇති බව ශ්රී ලංකා මහ බැංකුවේ වාර්තාවෙන් අනාවරණය වේ.
